Zabalera Metrikoko Sarea

Feve izan da Europako zabalera metrikoko sare handiena kudeatu duen konpainia; trenbide estuko 1192 km, hain zuzen. Integrazioari esker zabalera metrikoko 1210 km-ra iritsiko da, Adif-ek Cercedilla eta Cotos (Madril) artean dituen 18 km-ak eta Feve-k Espainiako iparraldeko probintzietan (Coruña, Lugo, Asturias, Kantabria, Bizkaia, Burgos, Palentzia eta León) eta Murtzian (Cartagena-Los Nietos linea) dituen 1192 km-ak batuko baitira.

Lehen trenbide estuak errepide bidezko trafikoa garatu aurreko garraioaren arazoa konpontzeko sortu ziren. Kantauri itsasoko ertzean, eremuko ezaugarri geografiko eta ekonomikoei egokitutako sarea ezarri zen. Zailtasun orografikoak zirela eta, trenbide estuen alde egin behar izan zuten, zabalak jartzea garestia baitzen.

1965ean Estatutua idatzi eta Ferrocarriles de Vía Estrecha (Feve) izena eman zitzaion Espainian tradizionalki erabilitako lineak baino estuagoak zirenek osatutako taldeari; ordura arte EFE (Explotación de Ferrocarriles por el Estado) enpresaren barruan zeuden. Bere historian zehar, Feve aldi berean bost zabalera desberdinetako trenbideak edukitzera iritsi zen: 1435 mm, 1062 mm, 1000 mm, 915 mm eta 750 mm.

1978az geroztik, estatuaren lurralde-banaketa autonomiko berria zela eta, linea batzuk beren autonomia-erkidegoetara transferitu ziren. Hori gertatu zen Kataluniako (1978), Valentziako (1986) eta Euskal Autonomia Erkidegoko sareko zati bateko (1979) trenekin. Gauza bera gertatu zen Mallorcako trenekin (1994) ere.

Orain arte www.feve.es atarian eskuragarri zegoen informazioa, baina, 2013. urte hasieraz geroztik, Renfe-ren (www.renfe.es), bidaiarien eta salgaien trenbide-garraioko zerbitzuei dagokienez, eta Adif-en (www.adif.es), trenbide-azpiegiturei dagokienez, webguneetan eskaintzen da.